اللي بقى لـي مـع الأيـام .. وفّيتـه
والضيق لـو ينهمـر تشربْـه وديانـي
ماهي كبيـره علـي والحـزن غنيتـه
ولاهـي غريبـه إذا وقـتـي تحـدانـي
الخوف -يا من نبشت القلـب وادميتـه
لاعشت زهرة شبابك وانـت وحدانـي!!
كم جرح خذْته من الأحبـاب.. ضمّيتـه
وجـروح قلبـي زكـاة لْحُـبّّ خِـلاّنـي
مطعون؟ عاااادي ،، جفا الأقراب؟ داويته
تعبان؟ مبطي ،، ردى هالحـظ؟ خاوانـي
صدمه؟ بسيطه ،، هَوان الحال؟ مرّيتـه
مقرود؟ أدري ،، وإذا حرمـان؟ عدّانـي
ما فـاح هـمّ ٍ لـك الله مـا تقهويتـه
مـا مـرّ حـزن ٍ بغيـري مـا تبلاّنـي!
ياما ويامـا مـن الخـذلان .. عديتـه
إلا بصاحبْ .. بعـد عِشـره تناسانـي!!
أزريـت لأنسـى غيابـه ليـن ناديتـه
والمـوت لامـن تجاهلنـي وجافـانـي
وينه يجينـي .. وكـل عْتـاب كنّيتـه
ياليت يدري بعـد فرقـاه وش جانـي!!
من كنت طفل ٍ وانا أرجـاه فـي بيتـه
شيّبت.. واثره علـى هالحـال خلانـي!
حتـى جنـاح العَتَـب لرضـاه ذليتـه
ماطِرْت بعـده فـرح مـن ذلّ جنحانـي
يا قلب صبرك .. ترى كل شيّ سويتـه
ما كان أفضل من اللـي كـان بإمكانـي
لو بيّ قـوه علـى الهجـران؟ خليتـه
لـو بـيّ ذره مـن النكـران؟ يفدااانـي
الجرح أرحم .. إذا يرجع مـن أغليتـه
مجروح؟ فِدوه .. ولكن صعب وحدانـي
موضوع: الجرح أرحم ... إذا يرجع من أغليته 
الخميس مايو 28, 2009 7:51 am
